Os santiagueses disputarán mañá ás 18:00 en Parque Sur o seu último partido da primeira fase desta competición. Cun rival que se atopa inmediatamente por encima na clasificación e que vén de empatar contra o Atlético Benavente como local o pasado sábado 13, os galegos buscarán sumar tres puntos cos que finalizar esta etapa e encarar a nova con forzas renovadas.
Nesta xornada, que será con horario unificado, fixaranse as prazas para os dous novos grupos que se formarán e nos que se decidirán os candidatos para o ascenso e descenso de categoría.
David Rial contará con todo o persoal salvo Javi López, e buscará como visitante unha vitoria que se lle resistiu na ida, ao caer os galegos por 0-2 na pasada xornada 7.
O adestrador dos composteláns comentou na rolda de prensa previa ao partido que “ tiñamos ganas de volver competir despois do parón da semana pasada. O equipo está a adestrar a un nivel moi alto, é o mellor momento da tempada en canto ao esforzo e dinámica de sesións. Necesitamos referendar isto con puntos o sábado para chegar con boas sensacións á segunda fase e poñeremos todo da nosa parte para que así sexa“.
O equipo viaxará no día, saíndo do Multiusos Fontes do Sar este sábado ás 8 e tendo a volta programada para inmediatamente despois de finalizar o partido. O encontro poderase seguir a través da canle de Youtube do equipo local.
Fuente: Jesús Figueroa.
Fuente: Prensa Santiago Futsal
